Руснаци до Шиду починаю приходзиц уж концом XVIII вику, кед ше ту почина и будовац лєтня владическа резиденция, хтора закончена коло 1780. року и хтора нєшка позната як Руски двор, алє ше 1803. рок официйно бере як рок приселєня Руснацох до Шиду. У Шиду Руснаци населєли углавним подруче коло Руского двору, бо и робели на маєтку тедишнього Шидянского властелинства. З початку були заварта заєдница, медзи иншим и прето же су дочекани од старожительох як нєприятелє. З початку єдина институция Руснацох у Шиду була Грекокатолїцка церква, з тим же парохия формована 1810. року. Руснаци у Шиду по 1833. рок мали свою општину, прецо, медзи иншим, и було части звади по медзи Сербох и Руснацох у Шиду, так же 1833. року руска општина у Шиду утаргнута. Цо ше дотика, школи нє познате точно кеди вона почала робиц, алє перши учитель за кого ше зна бул Янко Майорош, а то 30-и року XIX вику. Но руска школа теди ище вше нє мала свой будинок. Познєйше после 50-их рокох настава на руским язику ше отримовала у будинку хтори за тоти потреби купел крижевски владика и тот будинок ше нашодзел на месце дзе ше нєшка находзи руски дом. Будинок кед бул звалєни, 1969. року мал 170 роки. Окрем церкви и школи, Руснаци у Шиду нє мали други дружтвени институциї. Организовани културни живот почина аж по першей шветовей войни. Перше формовани месни одбор Руского народно просвитного дружтва 1919. року, алє вон нє функционовал, так же ше фришко загашел. Идуцого року, 1920. року, отворена Руска читальня, хтора ше и находзела у будинку, теди уж дакедишнєй, рускей школи. Од того року и почина организовани културни живот Руснацох у Шиду, хтори нєпреривно тирва и нєшка. Руска читальня практично нє гашела свою роботу, бо по войни, 1946. року лєм є пременована до Културно просвитного дружтва '' Дюра Киш '', хтору назву и нєшка ноши.

У роботи Дружтва ше можу обачиц три периоди:

1. период од 1920. по 1941. рок
2. период од 1945. по 1953/54 рок
3. период од 1962. року по нєшка.

Хорска, шпивацка и музична секция

У першим периоду, хорску секцию и оркестар водзел Григорий Дуда, емигрант зоз України, хтори у Шиду робел коло 10 роки и то углавним у 20-их и 30-их рокох. Тиж, 30-их рокох хор и оркестер водзел Силвестер Саламун, а зоз хором робел и тедишнї дзияк у церкви Горняк Михал. Шидянє теди мали барз масовни и успишни хор, хтори участвовал на смотрох. Шпивали ше шветови и духовни писнї, а под час кед хор водзел Силвестер Саламун углавним шпивал духовни писнї и то найчастейше у церкви за вельки швета. По войни роботу хору обновел професор Еуген Сабол и хор хтори вон водзел участвовал на преслави 200 рочнїци приселєня у Руским Керестуре. Хор робел по конєц 40-их рокох кеди ше, нажаль, гаши и од теди тота секция вецей нє робела, алє с часа на час ше зявйовал, цеком 50-их рокох, у рамикох драмскей секциї и то у масовних сценох зоз шпиваньом (бо теди представи були углавним музично – сценски фалати), як цо у представох’‘Хмара’‘и’‘Заврачане благо’‘. После того, хор и хорске шпиванє у Шиду подполно замера, нє було дзеки же би ше хор ознова порушал. Остатнє пробованє було 2004. року, алє без успиху, праве пре нєзаинтересованосц. Вєшенї 1962. року обновена робота Дружтва, а у медзичаше, истого року, професор Еуген Сабол у Гимназиї формовал оркестер и шпивацку групу хтору творел квартет – Ганча Бульчик (нар. Миклош), Андєлка Канюх, Споменка Шандор (нар. Югас) и Оленка Надь, хтори наступали и як квартет и як соло – шпиваче. Оркестар и шпивацка група наступела на другей’‘Червеней ружи’‘у Руским Керестуре 1962. року кед представяли Дружтво. После того, на’‘Червеней ружи’‘Дружтво, шицко по штредок 70-их рокох кед почала ознова робиц фолклорна секция, нє участвовало урядово. Шпивацка група у составе Ганча Бульчик, Андєлка Канюх, Споменка Шандор и Оленка Надь робела шицок час док робел и оркестер у Дружтву, углавним 60-их рокох. Як соло – шпиваче спред Дружтва наступали Зденко Барач 70-их рокох, теди наступел и на’‘Червеней ружи’‘як кантаутор, Бранислав Надь 70-их рокох, Никола Михняк 70-их и 80-их рокох, Обренко Лупич 80-их рокох, Ирина Колєсар, Дьордє Барна, Александар Иличич, Зденко Лазор и Сладяна Румпли 90-их рокох, Дуня Ждиняк 90-их рокох и тераз, як и Наташа Цирба, хтора почала 2005. року наступац як соло – шпивач. Соло – шпиваче участвовали и у представох у рамикох драмскей секциї, дзе праве бавели таки улоги. Милена Миклош по 1953. рок шпивала у таких представох, а у представи’‘Кандидат’‘шпивали Владимир Папданко, Томислав Майхер и Владимир Дорогхази, а их на гармоники провадзел Дюра Кечкеш, алє вони звонка представох нє наступали як соло – шпиваче. На инициятиву учителя Василя Мудрого и Борислава Барни 2000. року позберала ше жридлова група женох, хтора шпива руски народни – жридлови писнї и представя Дружтво на манифестацийох на хторих ше пестує жридлова писня, а тиж и участвує у програмох Дружтва. У жридловей групи нєпреривно робя Евгения Данчо, Андєлка Михняк, Мария Петрович, Гелена Провчи, Магдаленка Ганьто, Олга Матович, Фема Трбоєвич, Веруна Надь, а єден час робела и Ксения Карйцар. Жридлову групу з початку водзел учитель Василь Мудри, хтори тримал проби, виберал писнї, а о даскельо роки Жридловей групи у єй роботи помага оркестер Дружтва и Юлиян Рамач – Чамо зоз Руского Керестура, и єден час зоз Жридлову групу робела и Снежана Филагич. По медзи двома войнами Дружтво мало оркестер, хторого водзели Григорий Дуда и Силвестер Саламун, а робел зоз нїм и Горняк Михал. После войни од 1945. по 1954/55. рок зоз оркестром роби професор Еуген Сабол, з тим же 1955. року оркестер престава зоз роботу, а нєодлуга приходзи и до павзи у роботи Дружтва. У 1962. року професор Еуген Сабол, хтори теди бул професор и директор у шидянскей гимназиї’‘Сава Шуманович’‘, формовал тамбурови оркестер хтори наступел на другей’‘Червеней ружи’‘1962. року як проведзенє квартету у составе Ганча Бульчик, Андєлка Канюх, Споменка Шандор и Оленка Надь. У тим оркестру по 1963. рок грали: Илия Лабош (кларинет и саксофон, гоч практично грал шицки инструменти), Мирон Ерделї (контра), Мирослав Цирба (контрабас), Зденко Барач (гармоника), Зденко Данчо (контра), Звонко Сабол (кларинет), Елизабета Чикарич – нар. Глувня (гармоника) и Звонко Виславски (гармоника). Нови тамбурови оркестер, професор Сабол формовал 1963. року, алє вон бул барз вельки и робел лєм кратки час, так же 1964. року професор Сабол формовал други тамбурови оркестер у хторим грали: Адалберт Радецки – Доктор (виолина), Александар Сайковски (виолина), Владимир Миклош-Ицик (контра), Зденко Данчо (контра), Мирослав Цирба (контрабас), Елизабета Чикарич (гармоника), Зденко Барач (гармоника). Тот оркестар наступал у рамикох програми хторе Дружтво рихтало, а робел по 1965. рок, од кеди оркестер єден час нє робел. После валяня будинку, Дружтво ше селї до просторийох Руского двору, а 1970. року набавени инструменти за цали тамбурови оркестер. Оркестер почал водзиц Зденко Барач, єден час оркестер водзел и Яким Когут, алє кратко, а од Зденка Барача водзенє превжал Зденко Данчо, хтори оркестер водзел шицко по 80-и роки, кед оркестер пребера Обренко Лупич и познєйше Йован Маркович, хтори оркестер водза и нєшка. Єден час, док нє бул формовани стаємни оркестер, за Дружтво грали професор Ивица Ивакич и його група, а у тим чаше вельо помогнул и тедишнї Дом омладини, як и Драган Крсманович (гармоника), Илия Крсманович (виолина), Драган Макивич (гитара), Срба Герчич (контрабас) и Богдан Сремац (кларинет). Тиж, як помоц приходзел и оркестер зоз Руского Керестура, за потреби наступох. У 80-рокох Дружтво мало моцни оркестер, а на’‘Червеней ружи’‘1983. року музични ансамбл чишлєл 11 членох. Тих рокох у оркестри грали Владимир Ждиняк (гармоника), Зденко Данчо (прим), Балич Саша (бас – прим), Владимир Говля (гитара), Обренко Лупич (контра), Саша Давид (кларинет), Верица Петрович (виолина), Звездан Милатович (прим), Зоран Вукович (прим), Александар Вукович (кларинет), Снежана Лазич (гармоника), Златко Манько (контрабас). Познєйше ше уключую и Соня Чикарич и Саня Чикарич (гармоники), Надица Милашинович (флаута), Предраг Данилович и Ненад Милашинович (гармоники), а тиж и Йован Маркович, хтори и нєшка грає. Вони углавним грали дагзе по 1990. рок. У 90-рокох у оркестри Дружтва грали Йован Маркович (гармоника), Обренко Лупич (гитара и контра), Йосип Бенке (гармоника), Мирослав Михняк (кларинет и гармоника), Мирослав Джуджар (контра), Златко Манько (контрабас) и Звездан Милатович (прим). Окрем их, после 2000. року грали ище и Зоран Вукович (прим), Митар Ждиняк (прим), Илия Ждиняк (клавиятури), Борислав Ђордєвич (контра), Павлица (контрабас), Борис Ждиняк (прим и бас-прим), Игор Давид (гармоника), Борис Давид (гармоника), а єден кратки час грал и Михаел Говля (гитара). У терашнїм чаше, оркестер творя Йован Маркович, Обренко Лупич, Мирослав Джуджар, Мирослав Михняк, Златко Манько, и тиж Андрия Олеар – Мишко (контрабас и бас – прим). По штредок 80-их рокох Дружтво мало 3 прими, контрабас, 2 контри, а потим купени розглас, нова гармоника, миксета, 3 сталки за микркофони, 3 микрофони, кабли. Пре пожичованя и финансийни проблеми коло набавяня нових инструментох, число инструментох ше стаємно зменшовало, так же тераз Дружтво ма гармонику, два контри, розходовани контрабас и приму.

Драмска секция

Драмска секция, гоч почала робиц од самого снованя Дружтва, праве замахнуце у роботи почина 1938. року кед до Шиду, як вибеженєц, приходзи Юрий Шереги, познєйше познати режисер и театролог. Вон ше у Шиду затримал кратки час – рок, або рок и пол, алє зохабел позарядови драмски ансамбл, хтори и после його одходу зоз Шиду предлужел зоз роботу и дзекуюци Юрию Шерегию драмска секция у Дружтве постала наяктивнєйша секция у дальшим розвою Дружтва, єден час драмска секция була и єдина секция хтора робела и допринєсла же би ше Дружтво ознова ожило и запорало його подполне гашенє у 60-их рокох. Перши фалат хтори Юрий Шереги порихтал була’‘Хмара’‘, чия премиєра була 1939. року була у’‘Иличковей сали’‘у Шиду, у будинку дзе ше у тедишнїм шиду отримовали векши програми, а вон ше находзел на месце дзе нєшкайши СУП у Шиду двор СО-и Шид. Премиєра и даскельо репризи того фалату Шидянє барз добре прияли. Ансамбл хтори розвил Юрий Шереги облапял шлїдуюцих: Ирина Сабол – нар. Бесерминї, Ганча Канюх – нар. Данчо, Ганча Виславски, Ирина Ерделї, Лела Бесерминї, Илия Прокоп, Мария Перунски, Мария Данчо, Павлина Торма, Мелана Джуджар, Осиф Гарвилчак, Сенка Бесерминї, Леона Ерделї, Андри Загорянски (вон му бул асистент режиї), Симеон Гача, Ириней Бесерминї, Осиф Миклош, Петро Джуджар, Дюра Перунски, Осиф Канюх Мичурка и Йовген Канюх. Роботу зоз драмску секцию по одходзеню Юрия Шеригия, предлужел Андри Загорянски. Тиж, єден час зоз драмску секцию робел и учитель Михал Ковач. Вкупно, у предвойновим периоду поставени коло 10 фалати руских и українских писательох, а робени и фалати зоз вирску тематику и у тей часци роботи свойо доприношенє дали и шестри Василиянки. Такой по войни почина организована робота Дружтва и ознова починаю робиц шицки секциї, так и драмска секция, хтору у першим повойновим часу водзели Андрий Загорянски, Янко Саламун и професор Еуген Сабол, а дакус познєйше и Осиф Гарвилчак. Драмска секция наступела, вєдно з другим секциями, на преслави 200 рочнїци проселєня Руснацох до Югославиї у Руским Керестуре и то зоз представу’‘Сорочински ярмак’‘режиї Еугена Сабола. Еуген Сабол по конєц 40-их рокох режирал и’‘Наталку Полтавку’‘,’‘Наймичку’‘и’‘Заврачане благо’‘. Янко Саламун у Шиду робел по 1952. рок, кеди пошол до Коцура. Перши фалат хтори режирал бул’‘Нашо селянє’‘. У тим периоду, учитель Янко Саламун, як глумец – аматер и як режисер – початнїк участвовал и на семинарох за режисерох аматерох, хтори 50-их рокох тримани у Руским Керестуре и Новим Саду дзе им инструкторе були Петро Ризнич Дядя, Славко Симич и други. Зоз тих семинарох, учитель Янко Саламун принєсол знаня хтори познєйше, кед ше после 1956. року враца до Шиду, пренєсол на младих. Дружтво у 1951. и 1952. року ище було масовне и добре робело, а вец ше почало помали осиповац, углавним пре генерацийно зменьованє, а уж 1952. року до Коцура одходзи и учитель Янко Саламун. Же би ше Дружтво нє загашело подполно, Осиф Гарвилчак, добри глумец у Шерегийовим ансамблу, збера групу младих, були то подполно нови людзе, и порихтал’‘Покондирену тиковку’‘, хтора премиєрно виведзена у сали Словацким дому. То було 1953. року. Уж 1954. року, Осиф Гарвилчак режира и’‘Любовне писмо’‘, тиж премиєрно виведзено у сали Словацкого дома. У тим драмским ансамблу бавели: Мария Калай, Блаженка Дорокази, Блаженка Гарвилчак, Нада Варга, Юлка Соломар, Владимир Гача, Владимир Прокоп, Звонко Файфрич, Йовген Данчо, Дюра Когут, Йовген Цирба, Яким Нађ, Мирон Горняк. Медзитим, на половки 50-их рокох робота у Дружтве подполно замера. На инициятиву групи младих 1963. року обновена робота Дружтва и свою роботу починаю ознова шицки секциї, понеже их шицки водзи професор Еуген Сабол. Период 60-их рокох и єден час 70-их рокох би ше шлєбодно могол наволац як период драмскей секциї Дружтва, бо праве у тим чаше, и то 15 роки у континуитету, робела лєм драмска секция и дзекуюци нєй Дружтво и обстало у тих рокох. Понеже уж добре почали робиц фолклор и оркестер зоз шпивацку групу, почал ше такой 1963. року рихтац и єден фалат, як би Дружтво на програми хтора ше рихтала за єшень истого року нє наступело лєм зоз фолклором и шпивацку групу. Була то’‘Франтовнїца’‘, єднодїйка Петра Ризнича Дядї, хтору режирал Йовген Цирба, а у нєй бавели Мирослав Киш, Нада Киш, Владимир Бесерминї и Мирослав Цирба.’‘Франтовнїца’‘приказована у Шиду, Бикичу, Петровцох, Миклушевцох и була добре прията, так же Дружтво предлужує зоз роботу драмскей секциї. Виведзени, уж 1964. року фалат’‘На швитаню’‘Михала Ковача, ознова у режиї Йовгена Цирби. У тей представи бавело вельке число глумцох – аматерох, хтори познєйше предлужели роботу у Дружтву и хтори формовали стаємни глумецки ансамбл. Були то, окрем Йовгена Цирби, Владимир Хома, Дюра Хома, Зденко Данчо, Мирослав Киш, Йовген Лендєр, Гелена Чордаш, Споменка Югас, Андєлка Канюх, Мирослав Цирба, Владимир Гача, Венямин Бульчик. Идуцей театралней сезони, 1965/66 року, поставени фалат’‘Врацанє’‘у режиї Дюри Хома, а вец драмску секцию почина водзиц учитель Янко Саламун. Зоз представу’‘Кир Яня’‘у режиї Янка Саламуна Дружтво 1967. першираз участвує на Драмским мемориялу’‘Петро Ризнич Дядя’‘у Руским Керестуре и од теди стаємно, покля робела драмска секция. Вельки успих посцигла представа’‘Кандидат’‘, або’‘Стецко’‘, як ю волали, и тота представа вельо значела за Дружтво. Зоз ню ше вельо госцовало, алє цо найважнєйше тота представа афирмовала двох людзох без хторих ше робота Дружтва нє могла задумац. Були то Янко Саламун, як режисер, и Владимир Доракази як глумец, хтори скорей єден час бавел у Аматерским театру’‘Бранислав Нушич’‘у Шиду. Уж идуцого року, Янко Саламун рихта трагедию’‘Наймичка’‘хтора тиж виведзена и на’‘Дядї’‘, а у нєй бавели: Венямин Бульчик, Олга Лазор, Владимир Папданко, Єлена Митров, Гелена Чордаш, Мирослав Цирба, Илия Прокоп, Вера Загорянски, Дюра Джуджар, Мирослав Ждиняк и Данил Манько. Янко Саламун режирал и’‘Ожалосцену фамелию’‘,’‘Русалка Лала’‘,’‘На седмим нєбе’‘,’‘Фараонє’‘. Анасамбл углавним бул исти, алє ше з часом до ньго уключовали и други: Мирко Митров, Йовген Митров, Нада Майхер, Нада Бођвански, Гелена Миклош, Владимир Хент, Наташа Емеди, Драгица Ганьто, Ненад Адамчич и Драган Ракич. Штредком 70-их рокох драмска секция западла до кризи бо ше учитель Янко Саламун похорел и нє було фаховца у Шиду хтори би водзел драмску секцию. На наступох Дружтва на’‘Дядї’‘, ансамбл замерковал Дюра Папгаргаї, так же вон пристал робиц зоз секцию. То уж бул добри и убавени ансамбл. Порихтал Гогольову’‘Женїдбу’‘хтора принєсла драмскей секциї по теди найвекши успих у историї и воопще Дружтву, бо афирмовала Дружтво на єден висши уровень. Представа премиєрно виведзена у Дому култури у Шиду 1977. року, на Покраїнскей смотри була преглашена за найлєпшу, а участвовала и на Смотри аматерских театрох Сербиї, тиж и за найлєпшу на мемориялу’‘Дядя’‘, а участвовала и на Смотри аматерских театрох Медзирепубличней заєднїци’‘Сава’‘. У тей представи бавели: Венямин Бульчик, Вера Загорянски, Гелена Чордаш, Зденка Загорянски, Гелена Хома, Наташа Емеди, Илия Прокоп, Мирослав Киш, Владимир Дорокази, Владимир Папданко, Владимир Хент, Мирослав Цирба и госц зоз Нового Саду – Мирон Канюх. У представи тиж бавели и, теди деци, Владислава Сорочко, Биляна Цирба, Снежана Ђордєвич, Светлана и Драган Дорокази и Валентина Бульчик. Идуцей театралней сезони Дюра Папгаргаї режира’‘Камень за под главу’‘од Милици Новакович, представу хтора премиєрно виведзена у Шиду 1978. року хтора тиж посцигла вельки успих, так же ше пласовала на Покраїнску смотру и посцигла успих на Смотри аматерских театрох МЗК’‘Сава’‘у Лозници. Виводзенє у Лозници у юлию 1979. року було остатнє виводзенє тей представи и остатнє вивидзенє воопще тедишнєй драмскей секциї, после чого робота тей секциї подполно замера. У представи бавели: Мирослав Киш, Венямин Бульчик, Зденка Загорянски, Владимир Дорокази, Гелена Хома, Йовген Цирба, Радослав Данчо и млади – Весна Цирба, Владимир Джуня и Мирослав Папуга. Тоти два представи принєсли нову сцену до Шиду – зоз технїку, шветлами. Майстор шминки бул Ранко Белянски зоз Сербского народного театру у Новим Саду, майстрове шветла були Петар Чижмар и Слободан Груюч, суфлери Вера Гарди и Гелена Хома. Представи нєпреривно провадзели и Йовген Папуга, Мирко Майхер, Владимир Сорочко, Милош Ђордєвич. Костими кажди глумец себе рихтал, а сценографию за шицки фалати, окрем представи’‘Камень за под главу’‘поробел Мирослав Цирба. У найвецей, а даєдни и у шицких, представох хторе у своєй 15-рочней нєпреривней дїялносци виведло Дружтво, бавели: Венямин Бульчик, Владимир Дорокази, Мирослав Цирба, Мирослав Киш, Мирко Митров, Илия Прокоп, Гелена Чордаш, Владимир Хент, Дюра Хома, Йовген Цирба, Владимир Папданко, Томислав Майхер, Владимир Гача, Вера Загорянски, Зденка Загорянски, Нада Майхер, Єлка Митров, Ганча Бульчик, Споменка Югас, Андєлка Канюх, Владимир Кулич, Верка Боднар, Мирослав Джуджар, Наташа Емеди, Гелена Хома. Окрем нїх у представох бавели и Нада Киш, Владимир Бесерминї, Евгения Данчо, Йовген Лендєр, Данил Манько, Йовген Митров, Дюра Джуджар, Мирко Миклош, Гелена Миклош, Радослав Данчо, Мирослав Папуга, Весна Цирба, Драган Ракич, Ненад Адамчич, Драгица Папданко (нар. Ганьто), Злата Давид (нар. Данчо), Владимир Джуня, Мирон Канюх. После подполного замераня драмскей секциї, у Дружтве робела углавним фолклорна секция, хтора праве и отримала Дружтво по нєшкайши днї, гоч було пробованя ознова порушац драмску секцию, алє без успиху, бо нє було правей дзеки за то. З часу на час кратки скечи пририхтовал Владимир Дорокази, хтори виводзени у рамикох програми Дружтва, углавним як точка помедзи фоклорним виводзеню. У 2004. року Дружво участвовало на локалней манифестациї’‘Днї городу Шиду’‘хтора отримана од 22. по 24. май 2004. року и у хторей Дружтво виведло музично – сценски фалат’‘Руску свадзбу’‘, як кратке приказованє руских свадзебних звичайох, хтору обдумали Борислав Барна и Мирослав М. Цирба, а хореографски пошорел Борислав Барна. Тот музично – сценски фалат виведзени лєм ище раз и то истого року на Коцурскей жатви.’‘Руска свадзба’‘була наисце фалат у хторим участвовали члени фоклорней и музичней секциї и жридловей шпивацкей групи, як и члени познєйше обновеней драмскей секциї и то: Данил Надь, Драга Задрипко, Веруна Нађ, Мирон Джуджар, Наташа Цирба, Игор Папданко, Мирослав Папданко, Саня Тиркайло, Борислав Барна, Михаел Говля, Мирослав М. Цирба, Небойша Барна, Игор Румпли, Игор Миятович, Владимир Говля, Владимир Торма, Евгения Данчо, Андєлка Михняк, Гелена Провчи, Фема Трбоєвич, Магдаленка Ганьто, Олга Матович, Мария Петрович, Звонко Югас, Мирко Киш, Оленка Киш, Бояна Барна, Биляна Градянин, Дуня Гнатко, Дуня Ждиняк, Ивана Сечевич, Драгана Ралич, Мануела Буила, а’‘Руску свадзбу’‘провадзел оркестер Дружтва у составе: Йован Маркович, Обренко Лупич, Мирослав Джуджар и Златко Манько и як госц Юлиян Рамач – Чамо. Успишни наступ’‘Рускей свадзби’‘ознова ожил идею о порушованю драмскей секциї, хтора нєодлуга, як увидзиме почала наисце и робиц. Учителька Златка Сивч – Здравич тиж робела на порушованю драмскей секциї, и то зоз дзецми хтори ходза на годзини руского язика, а источашнє су и члени Дружтва, так же после тромешацовей роботи 25. юния 2005. року и премиєрно виведзена дзецинска представа’‘Живот краля Квазибаса’‘од Бранислава Црнчевича у драматизациї Миряни Марковинович, а у режиї учительки Златки Сивч - Здравич . У представи бавели Игор Румпли, Александар Иличич, Инес Папуга, Дьордє Барна, Иґор Мохнацки, Небойша Барна, Мария Барна, Наташа Мохнацки, Мая Буила и Саня Буила. Ориґинални костими зошила Миряна Барна, а о музики ше старала учителька. Вжиме 2004. року ознова почала робиц драмска секция зоз представу’‘Франкенштайн’‘хтору по мотивох Мери Шели режирал Цветин Аничич и хтора премиєрно виведзена 23. септембра у руским доме у Шиду и по тераз мала 10 виводзеня, освоєла велї награди и мала наступи у Новим Бечею, Руским Керестуре, Нишу, Сербским народним театру у Новим Саду, Беочину. У представи ше направел уж убавени ансамбл и тим у составе Иґор Ґрекса, Нада Хромиш – Аничич, Мирослав М. Цирба, Милян Торма, Миряна Йованович, Владимир Джуня, Брансислав Нешич и Саня Тиркайло, музика Душица Маркович, технїка Горан Жилич. Характеристика того ансамблу же у нїм бавя и гевти цо нє Руснаци, алє ше барз добре знаходза зоз руским язиком. Оригинални костими сами глумци, а понайвецей режисер, порихтали, а у тим вельку помоц дала Миряна Барна, а у костимографиї участвовала и Борислава Бибич. Сценографию поробели Цветин Аничич, Мирон Джуджар, Милян Торма и Мирослав М. Цирба. Алє, почим представа ище жиє о нєй тельо, як и о роботи драмскей секциї, хтора тераз уж позберала векше число заинетересованих членох и пред хтору красна будучносц. Обнавянє драмскей секциї дало моци и старшим так же ше и вони почали ангажовац коло театра. Так, Мирон Джуджар у рамикох фестивалу монодрамох у организациї ГО Рускей матки у Новим Саду порихтал монодраму’‘Вични бриги’‘од Серафини Макаю, хтору сам и режирал, зоз помоцу Мирона Канюха и Ярослава Сабола и хтора премиєрно виведзена у РКПД Нови Сад 13. новембра 2005. року, а у Шиду 26. новембра 2005. року. Рихтанє монодрамох ше предлужело у Дружтву и у 2006. року, а то ознова до роботи врацело и старого члена Венямина Бульчика.

Фолклорна секция

И фолклорна секция почала такой робиц по формованю Дружтва. Як и други секциї, почал ю водзиц Григорий Дуда, а єден час пред войну зоз ню робел и Юрий Шереги, хтори уведол праве ученє танцох, як прави педагог, так же поставел фундаменти познєйшого констатного отримованя роботи фолклорней секциї. Медзитим, Юрий Шереги нє робел длуго зоз фолклором, алє ше пошвецел драмскей секциї, як зме уж и гварели. У перши час члени фолклорней секциї були источашнє члени и других секцийох, так же практично велї робели у истошачнє у шицких секцийох – и танцовали и глумели и шпивали и грали. Фолклорна секция и теди, як и нєшка, була найчишлєнша секция. После войни фолклорну секцию водзели Еуфемия Бесерминьски, хтора перша анимировала членох после войни, а нєодлуга ше єй прикдружели и Еуген Сабол и Янко Саламон, а єден час робел и Яким Мудри – Минар, хтори грал и на гармоники, бул позарядови шпивач у хору, участвовал у пририхтованю велїх театралних фалатох, а тиж и вельо помогнул у роботи Дружтва воопще, и ту робел шицко по 50-и роки кед пошол до Нового Саду. Як хореограф, фолклор єден час водзел и учитель Янко Саламон, алє и вон векшу увагу давал роботи драмскей секциї, а тиж 50-их рокох робел и Маихал Нађ. Фолклорна секция наступала углавним у Шиду и околїску, а, вєдно зоз другим секциями, наступела и на преслави 200 рошнїци приселєня Руснацох у Руским Керестуре. Пре звади помедзи членами Управного одбору и руководительох секцийох и пре осипованє членства штредком 50-их рокох секциї єдна по єдна ше гаша, и Дружтво подполно замера. После обнавяня Дружтва, такой почала робиц и фолклорна секция, хтору порушал Еуген Сабол, хтори бул и хореограф и хтори поставял, за тедишнї час, атрактивни хореографиї. Фолкорна секция формована после формованя оркестру и шпивацкей групи и наступала углавним у Шиду и околїску, углавним у Бикичу, Миклошевцох и Петровцох. Вельку помоц при поставяню хореографийох дал и Михал Нађ, хтори пред концом 40-их и 50-их рокох бул єден од найлєпших танєчнїкох у Дружтву, и хтори поставел велї хореографиї и хтори заменєл Еугена Сабола у водзеню фолклорней секциї. Фолклорна секция теди чишлєла 20 членох и мала комплетне облєчиво. Медзитим, нєодлуга престава робиц и подполно ше гаши 1965. року, так же у Дружтве од теди та єден длукши час роби лєм драмска секция. Послей вецейрочней павзи, 70-их рокох знова почина робиц фолклорна секция, точнєйше 1975. року кед секцию почина водзиц учителька Ксения Саламун. Бул то чежки задаток бо ознова требало позберац дзеци, алє ше єй удало, а мала потримовку и родичох, хтори за дзеци покуповали платна, а облєчиво зошила Єлена Хома, сами вишивали вишивки и сами правели венчики. Облєчиво пожичоване и зоз Руского Керестура. Цеком 80-их рокох набавяне облєчиво за руски и сербски танци, так же тераз Дружтво солидно опремени зоз облєчивом. З часом до фолклорней секциї почало приходзиц шицко вецей дзецох, так же нєодлуга формована и старша и младша група, а 1981. року Дружтво достало Орден Братства и єдинства од Предсидательства СФРЮ, цо вельо у моралним смислу помоглу у розвиваню роботи Дружтва. Окрем того, Дружтво достал и два децемберски награди, награди хтори општина Шида додзелює найзаслужнєйшим установом и поєдинцом за розвиванє култури у општини Шид. Учительки Ксениї Саламон у роботи зоз секцию єден час помагали и хореографе Богдан Виславски и Владимир Виславски зоз Нового Саду и Юлиян Рац зоз Руского Керестура. Перши наступ тота генерация фолклорней секциї мала на’‘Червеней ружи’‘идуцого року, а потим ушлїдзели велї други наступи. Углавним то були наступи з нагоди Дня ошлєбодзеня Шиду, Дня младосци, так же урядова робота фолклорней секциї познєйше допринєсла же анї єдна манифестация хтора ше организовала у Шиду нє могла прейсц без нашого Дружтва, як то и нєшка. Фришко по формованю секциї, ушлїдзели наступи по велїх местох нашей жеми, так же углавним Дружтво госцовало у шицких векших городох бувшей Югославиї. Фолклорни ансамбл обиходзел роботни бригади у Риєки и на Паличу. Каждого року участвовал на општинскей и зонскей смотри фолклору, а 1986. и 1987. року ше пласовал на покраїнску смотру фолклору у Бечею, односно у Зомборе, дзе нє освоєли награди. На 42. покраїнскей смотри фоклору 2003. року у Бечею фолклорни ансамбл освоєл стриберну плакету, цо по тераз найвекши успих Дружтва у рамикох роботи фолклорней секциї. На змаганю МЗК’‘Сава’‘1980. року фолклорни ансамбл завшал 3. место и як награду достал облєчиво за танци зоз Шумадиї. Тиж, Дружтво участвовало на’‘Иваницких кресох’‘у Копривници, 1979., 1980и 1985. року, дзе наш ансамбл бурз барз замерковани, гоч то було лєм ревиялне участвованє. Од других ревиялних участвованьох фолклорного ансамблу, треба повесц же участвовало на’‘Петровских дзвонох’‘у Петровцох 2002. року, на’‘Иванским квицу’‘у Долову 2003. року, наступало у Спортским центру’‘Шумице’‘у Београду 2003. року, у рамикох сотруднїства зоз КУД’‘Вук Караджич’‘зоз Београду, на медзинародним фестивалу у Баймоку 2004. року, на Медзинародним дню дзецка у Београду 2005. и 2006. року у организациї Жидовскей општини Београд, зоз хтору Дружтво направело добри контакт. Дзекуюци праве тей активносци, Дружтво розвило товаришки вязи зоз велїма културно – уметнїцким дружтвами у жеми хтори ше отримовали зоз медзисобним нащивами каждого року. Були то културно – уметнїцки дружтва’‘Абрашевич’‘зоз Бачкей Паланки, Дом култури зоз Лашници при Лозници, КУД зоз Копривнїцких Иванцох при Копривници, КУД’‘Тарас Шевченко’‘зоз Дюрђова,’‘Вук Караджич’‘зоз Београду. Каждого року ше наступало на’‘Червеней ружи’‘и познєйше на Коцурскей жатви, як то и нєшка. Такой з початку роботи ше роздумовало, систематски, о нашлїднїкох руководительох секциї, так же нєодлуга найлєпши танцоше, Борислав Барна, Весна Цирба и Душанка Чордаш пошли на семинар до Руского Керестура, алє з роботу у секциї предлужел лєм Борислав Барна, хтори концом 70-их и початком 80-их рокох помали пребера руководзенє зоз секцию, точнєйше 1981. року после семинару за хореографох у Илоку у организациї Союзу Руснацох и Українцох. Того року Борислав Барна достава награду за 1. место за хореографию на’‘Червеней ружи’‘и практично почина водзиц фолклорну групу. Учителька Ксения Саламон ище даскельо роки по одходу до пензиї робела зоз фоклором, а вец секцию конєчно препущела младим. У тим чаше, окрем Борислава Барни зоз фолклором робели и Миряна Барна и Єлица Лупич, а зоз младшу групу робели Блаженка Клер (нар. Пажитняй), Верица Червеняк (нар. Батић) и Єлена Милашиновић (нар. Катанович). Єден час, од 1981. по 1983. рок, кеди пошол до Австралиї, зоз фолклорну секцию робел и Горан Солакович. У 90-их рокох зоз фолклорну секцию робели Горан Митрович, хтори ище вше, гочнє трима проби, роби и стаєнмо помага у роботи фолклорней секциї, и Наташа Джуджар (нар. Бульчик), а тиж єден час робела и Нада Хромиш – Аничич. У найновши час, проби тримаю и стараю ше о секциї Бояна Барна и Дуня Ждиняк, а од хлапцох Игор Папданко и Владимир Щурок. Початком 70-их рокох, док ше просториї Дружтва находзели у дакедишнєй школи’‘Бранко Радичевич’‘у Шиду, Дружтво було домашнї и организатор ткв.’‘Малей ружи’‘, на хторей участвовали фолклорни ансабли зоз Шиду, Бикичу, Петровцох, Миклушевцох, Вуковару и Осеку и то уствари було квалификация на фестивал ''Червена ружа'' у Руским Керестуре. Но, познєйше, ''Мала ружа'' преходзи до Руского Керестура и пременєла характер. Дружтво пробовало обновиц ''Малу ружу'' и врациц ю до Шиду, так же ю 2003. року организовало у Шиду, алє ту ше стануло пре финансийни проблеми.

Други секциї

Окрем хорскей, шпивацкей, музичней, драмскей и фолклорней секциї, у Дружтву робели и робя и нєшка литерарна и спортска секция, єден кратки час робела и подобова секция, хтору водзел Далибор Огризович, хтори и нєшка роби плакати, подзекованя и графични дизайн за потреби Дружтва. Тота секция робела по отвераню Дома, а хвильково роби и нєшка, през рисованя на Вельку ноц и подобне. Литерарну секцию єден длукши час водзел учитель Василь Мудри, а тиж ю водзели и учительки Ксения Саламун и Ясна Аврамович. У нєй робели дзеци и млади хтори ходзели на годзини руского язика и источашнє були и члени Дружтва. Члени секциї писали писнї, приповедки и подобне, а тиж и участвовали на змаганьох рецитаторох. У рамикох тей секциї на републичней смотри рецитаторох участвовали спред Дружтва Весна Мерданович (нар. Цирба), Нада Хромиш – Аничич и Сладяна Румпли. Спортска секция почала зоз урядову роботу зоз отвераньом нового Дому, гоч пред войну и по войни у рамикох Дружтва робел и ФК’‘Злога''. Тераз, найвекша активносц секциї у рамикох спортских бавискох’‘Яша Баков’‘и то у малим фотбалу, столним тенису и шаху. Секцию водзи Драган Барна, хтори тераз водзи младшу групу у столним тенису у Установи’‘Партизан’‘у Шиду, а инше є и одвичательни за змаганє у столним тенису у рамикох Дружтва. Стаємну екипу за мали фотбал, медзи иншим, творя Юлиян Ковач, Звонко Гнатко и Горан Гарвилчак, а за шах Владимир Щурок, Штефан Щурок и Мирон Джуджар. Дружтво домашнє за столни тенис у рамикох СБ’‘Яша Баков''.

Организация Дружтва

Од самого початку, Дружтво ма ушорену организацию, зоз рижним организацийним єдинками, як цо скупштина, управни одбор, предсидатель Дружтва, уметнїцки совит и подобне. У чаше скорей войни сигурно же Дружтво мало шицки потребни органи, алє нажаль нє остало зазначене же хто теди водзел Дружтво, гоч ше то може (нє зоз сигурносцу) дознац прейґ фотографийох зоз тедишнього часу, бо ше члени управи Дружтва обовязно сликали вєдно зоз аматерами. Як зме уж гварели, 1963. року обновена робота Дружтва, так же млади формовали свой управни одбор, чиї предсидатель бул Еуґен Цирба, подпредсидатель Владимир Бесерминї, а секретар Венямин Бульчик. Нєодлуга, уж истого року, кед старши видзели же млади озбильни у роботи, збера ше скупштина и вибера ше нови и прави управни одбор. Предсидатель бул Еуґен Сабол, а секретар Еуґен Цирба. Професор Сабол водзел Дружтво кратки час, так же швидко место предсидателя пребера Дюра Хома, хтори на чолє Дружтва бул понад 20 роки, шицко по штредок 80-их рокох. После Дюри Хоми, на место предидателя вибрани Владимир Дорокази. Окрем, його, управу Дружтва творели и Дюра Хома, Венямин Бульчик, Мирослав Цирба, Йосип Гарвилчак, Радослав Данчо. На скупштини хтора отримана 22. януара 1991. року за предсидателя Дружтва вибрани Борислав Барна, а окрем його до управного одбору вибрани и Славко Цупер, Мирослав Цирба, Златко Манько, Венямин Бульчик, Владимир Говля и Штефан Щурок, Владимир Торма, а у управи тиж були и Зденко Червеняк, Обренко Лупич, Драган Барна. Владимир Говля и Штефан Щурок були и подпредсидателє Дружтва цеком 90-их рокох. Секретар Дружтва цеком 80-их рокох бул Мирослав Цирба, после його секретар бул Владимир Сорочко, а вец Владимир Дїтко. Терашнї управни одбор, у составе Борислав Барна – предсидатель, Юлиян Ковач – подпредсидатель, Мирослав М. Цирба – секретар, Звонко Гнатко, Ґоран Митрович, Мирослав Папданко, Звонко Югас, Мирко Ждиняк, вибрани у януару 2004. року, а место Нади Рудич, кооптировани Златко Манько. Почим тот управни одбор ище вше у мандату, о нїм тельо.