Националне швето будзе у Шиду?

[kiki]

Текст зоз поволанки директора Завода за културу войводянских Руснацох

Зоз 21. схадзки Одбора за културу Националного совиту Руснацох отриманей 5.11.2009. препоручене ше же би ше централну Шветочну академию трецого означованя Националного швета Руснацох – 17. януара, наступного, 2010. року – отримало у Шидзе, пре означованє 90-рочнїци од початку орґанизованого културно-просвитного живота и активносцох Руснацох у Сриме.
Одбор виражел думанє же централна програма з нагоди Националного швета Руснацох у Шидзе вельо допринєше дальшому пестованю, розвою и очуваню националного идентитета на тим просторе, алє и подзвигованю уровня свидомосци локалного штредку о живоце и соживоце Руснацох и з Руснацами у Шидзе и шидскей општини.
Одбор заключел же би ше концепцию програми Шветочней академиї з нагоди Националного швета зверело Заводу за културу войводянских Руснацох.
Тиж так, пре програму з нагоди Националного швета, алє и дальши його активносци з рижних нагодох, потребне ознова формовац Национални оркестер, цо тиж зверене Заводу за културу войводянских Руснацох.
Одбор Националному совиту предложел и же би принєсол заключенє (одлуку), же би ше Шветочну академию з нагоди нашого Националного швета 2011. року отримало у Коцуре, а 2012. у Дюрдьове.
Одбор предложел же би ше за Шветочну шпиванку Руснацох на тих просторох прилагодзело, прешпивало на наш руски язик, текст обще прилапеней гимни Руснацох швета “Порученє” Александра Духновича, за цо задлужени Ирина Гарди Ковачевич и Михайло Зазуляк.
Поволуєме Вас же бисце участвовали у розправи и креированю концепциї Шветочней академиї з нагоди Националного швета котра ше отрима 2. децембра на 15 годзин у просторийох Завода за културу войводянских Руснацох у улїчки Стражиловскей 9. у Новим Садзе.
Циль того схода поставянє концепциї наиходзацей преслави Националного швета, як и поставянє основох за преслави будуцих рокох.