|
kiki
|
 |
« on: November 17, 2009, 04:46:41 PM » |
|
Руске Културно Просвитне Дружтво "Дюра Киш" зоз Шиду госцовало у Риєки
Як цо и було предвидзене, а на поволанку пана Владимира Провчия, предсидателя Руского дружтва "Рушняк" зоз Риєки, у периодзе од 13.-го по 15.-ти новембер, Културно Просвитне Дружтво "Дюра Киш" зоз Шиду, нащивело Риєку, Опатию и Матулї. Члени Дружтва зоз Шиду соботу 14.-го новембра отримали цаловечарши концерт у барокней сали театра "Фило Драматико" у Риєки, а потим участвовали и на руским балу. Соботу предполадньом Шидянє зоз паном Провчийом обишли туристични интересантносци опатийскей ривиєри.
Гоч тото иножемне госцованє векшини шидским аматером перше у їх потерашнєй танєчней кариєри, понеже то млада фолклорна ґрупа, по указананей дзеки за танцованє, озбильносци у справованю и квалитетним фолклорним наступу, то ше нє могло замерковац. Шицки 5 танци хтори одтанцовани на концерту у Риєки, виведзени на високим уметнїцким уровню, як и шпиванки у интерпретациї Наташи Цирбовей и Танї Надьовей. Щири и моцни аплаузи публики после каждей виведзеней точки найлєбше потвердзенє квалитетного и удатного концертного вечара шидянских аматерох у Риєки.
Треба ище надпомнуц и то же по законченим концерту, Шидянє, дзепоєдни фолклорни и шпивацки точки повторели и на руским балу. То додатно "подзвигло" атмосферу, а боме и нащивительох, так же остатнї госци зоз балу пошли аж над раном. Гоч, так повесц, без одпочивку скоро 2 днї, шидянски аматере ше зоз нєпреривним танцованьом на балу указали и доказали як нє вистати танцоше. То резултовало зоз поволанку представителя руского културного дружтва зоз Осиєку же би Шидянє у найскорши час нащивели тот варош и у нїм отримали свой цаловечарши концерт.
М.Ш.
|
