Културно просвитне дружтво "Дюра Киш" зоз Шиду на госцованю у Риєки

[kiki]

На поволанку пана Владимира Провчия, предсидателя Руского дружтва "Рушняк" зоз Риєки, Културно Просвитне Дружтво "Дюра Киш" зоз Шиду, нащиви Риєку, Опатию и Матулї у периодзе од 13.-го по 15.-ти новембер. Члени Дружтва зоз Шиду на соботу, на 18 годзин отримаю цаловечарши концерт у барокней сали театра "Фило Драматико" у Риєки. Потим предвидзене же би участвовали и на руским балу, и як учашнїки и як госци. Шлєбодни час, пияток и внєдзелю, предвидзени же би Шидянє зоз паном Провчийом нащивели и обишли туристични интересантносци Риєки и Опатиї.

За тото госцованє шидски аматере ше пририхтую уж длукши час и то зоз вельку дзеку, понеже тота ґенерация танєчнїкох по тераз ище нє була на госцованю у иножемстве. Так же то велїма будзе нє лєм перша турнея зоз фолклором до иножемства, алє и вообще перши одход споза гранїцох Войводини и Сербиї.

Єдна од причинох прецо руководство КПД "Дюра Киш" у априлу того року анґажовало кореоґрафа Миломира Шайтоша зоз Нового Саду и тота же би вон пририхтал репертоар и подзвигнул квалитет фолклорней ґрупи за отримованє самостойних концертох у иножемстве. Одход до Горватскей, до Риєки, укаже дзе фолклорна секция КПД "Дюра Киш" нєшка по квалитету, односно кельо зоз ню ище єст роботи. То окреме важне кед ше зна же за идуци рок уж догварени госцованя у Румуниї, Мадярскей и Словацкей, а у виглядзе и госцованє у Польскей. А спрам словох кореоґрафа Миломира Шайтоша, чи КПД "Дюра Киш" одпутує на шицки тоти начишлєни госцованя нє завиши на тельо од квалитету фолклорней секциї, понеже зоз кажду пробу вон рошнє и уж є на уровню других руских Дружтвох цо ше и укаже ширшей рускей явносци на преслави Дня Руснацох хтора предвидзена же би ше отримала праве у Шидзе 17.-го януара наступного року, кельо од финансийней ситуациї, односно од потримовки визначних руских институцийох шидскому КПД "Дюра Киш", хторей по тераз нє було у даякей значней мири.

М. Шайтош