Културно-просвитне дружтво ''ДЮРА КИШ''
Дня 13. октобра 2009. року
Ш И Д
НАЦИОНАЛНИ СОВИТ РУСНАЦОХ
Послате на
rusovit@Eunet.rsПРЕДМЕТ: Конструктивни предлоґ за бисту Михала Ковача
Понеже того року означиме 100 рочнїцу од народзеня нашого познатого учителя и писателя Михала Ковача, здогадаме же є народзени у Шиду, и снователь є школи у Бикичу и то школи на руским язику. Михал Ковач мал вельки заслуги за розвой рускей заєднїци на подручу шидскей општини и як зоз його дїлох видзиме, бул барз вязани за тот сримски штредок.
Потримуєме идею и акцию же би ше виляла бронзова биста Михала Ковача, алє тиж предкладаме же би тота биста була положена праве у Бикичу, пред школу, хтору праве вон основал и у хторей бул перши учитель. На памятнїку би було написане о тим же хто бул Михал Ковач. На тот способ, терашнї ґенерациї и будуци ґенерациї буду знац же Михал Ковач основал єдну школу на руским язику у єдним руским месце, цо барз велька ствар, и то у хвильки кед ше исти тот штредок намага же би ознова врацел руски язик до сримских школох, бо язик єден од фундаментох єдного народу. Снованє школи у єдним месце велька ствар и прейґ того ше нє шме лєм так прейсц.
Нє маме нїч процив же би биста була положена и на теметове, алє на теметов, по правилу, бисти кладзе, фамелия, а заєднїца кладзе памятнїк там дзе ше находза живи людзе, дзе ше розвиваю нови ґенерациї, там дзе тот памятнїк наисце будзе вершиц свою функцию.
Тоту идею потримує и Месни одбор Дружтва Бикич, хтори то и предложел на схадзки од 23. септембра того року, допис посила Вивершни одбор Дружтва, хтори прилапел идею на схадзки 12. октобра того року, вєдно зоз Месним одбором у Бачинцох, а до акциї ше дзечне уключи, нє лєм нашо Дружтво, алє и Месна заєднїца Бикич.
Праве пре тоти, подполно розумни обгрунтованя, предкладаме же би руска заєднїца, з нагоди 100 рочнїци од народзеня Михала Ковача плановану бисту Михала Ковача положела до Бикичу пред школу, хтору праве Михал Ковач основал и у хторей бул перши учитель.
З почитованьом,
ПРЕДСИДАТЕЛЬ ДРУЖТВА
Мирослав М. Цирба в.р.
