РУСНАЦИ
[/b]
Руснаци на подручу нєшкайшей Сербиї жию понад 260 роки. У нашей богатей традициї,
17. януар 1751. року остал зазначени як окремни датум – того дня администратор коморских маєткох Хабзбуршкей монархиї у Бачкей – Франц Јозеф де Редл подписал контракт о насельованю коморскей пустари Вельки Керестур и дал го Михайлу Мункачию, зоз валала Червеново у жупаниї Берег, же би приведол 200 руских грекокатолїцких фамелийох зоз горнїх жупанийох и населєл их на спомнутей пустари. Гоч постоя официйни докази зоз 1746. року о присуству вецей руских фамелийох у Бачкей, 17. януар 1751. року бул официйни початок Руского Керестура – найстаршого, найвекшого и найпознатшого места Руснацох у Войводини и Сербиї, и праве прето тот датум вибрани за националне швето Руснацох. После широких конзултацийох рускей заєднїци,
Национални совит Руснацох на своєй схадзки принєсол Одлуку о утвердзованю 17. януара за националне швето Руснацох и источашнє утвердзел и национални символи Руснацох у Сербиї.
Руснаци ше присељели зоз ткв.
'' Горнїци '' – горњей жеми, односно зоз сиверо – восточних жупанийох тедишнєй Угорскей, хтори ше нєшка находза у восточней Словацкей, Закарпатскей України и Мадярскей. Такой по насельованю Керестура, 1763. року Руснаци ше приселюю до Коцура, и з часом поставаю числєньша заєднїца.
Официєлно, до Шиду ше Руснаци приселєли 1803. року, а цеком XIX вику ше приселєли и до Беркасова, Бачинцох и Бикичу. После першей шветовей войни, на Велькей народней скупштини о зєдинєню Войводини зоз Сербию, 1918. року, участвовал аж 21 представнїк Руснацох. Нєшка Руснаци жию, окрем у спомнутих местох, и у Новим Саду, Дюрдьову, Новим Орахову, Кули, Вербасу, Суботици, Ґосподїнцох, Сримскей Митровици, Жаблю, Бачкей Тополї, Београду.
Руснаци за себе гуторя же су '' Руснаци '', свой язик наволую '' руски язик '' и од вше пишу зоз кирилку. По историйним походзеню, Руснаци Восточни Славянє, у штреднїм вику, Руснацами наволоване жительство тедишнєй Києвскей Руси, односно познєйше жительство
Галицийско – волинского князовства, хторе було перша и права руска держава.
Галицийско – волинске князовство настало 1084. року кед владарска хижа Ростиславичох одзелєла заходну часц од Києвского князовства, 1199. року ше прилучує Волинска обласц, а княз Данило 1253. року бере коруну краля, гоч ше тота титула нє затримала медзи його нашлїднїками. Галицийско – волинске князовство була моцна держава у тим делу Европи, а о нєй писали и заходни хроничаре. Тота держава предлужує традицию и державносц Києвскей Руси, кед Києв спаднул под Татарох, 1240. року.
Народ хтори жил у тей держави затримал свою прави назву – Руснаци по нєшкайши дзень. Наша держава – Галицийско – волинске князовство ше 1340. року зєдинює зоз Литву, а вєдно зоз Литву уходзи у состав Польскей, так же ше подполно траци наша державносц, алє традиция державносци ше у нашим народу затримала по нєшкайши дзень.
КПД '' Дюра Киш '', як и опредзелєне у нашим Статуту, у 2007. року започал преширйованє своєй дїялносци и на други нашо места у шидскей општини, хторе ше одвива на рижни способи, и прейґ уключованя людзох зоз шицких наших местох до секцийох у Шиду и прейґ формованя ґрупох и секцийох у наших валалох. Так зме на схадзки зоз родичами
12. септембра 2007. року порадзели формованє фолклорней групи Бикич, перши проби почали 17. септембра 2007. року, до роботи групи ше уключело 20- ро дзеци, а вельку потримовку дали родичи и други жителє Бикичу, окреме
Майхер Жарка хтора зошила єдну часц облєчива за наших малих товаришох зоз Бикичу. Окрем єй, облєчиво шили и
Веруна Надь зоз Бачинцох и Верица Югас зоз Шиду. Фолклорну ґрупу Бикич водзи Наташа Цирба.
Руски язик наволайме го так, '' есперанто '' за шицки славянски язики, окреме за восточно и заходно славянски язики. Хто зна руски язик, без проблему може розумиц словацки, українски, польски язик. Язик Руснацох у Войводини официєлно кодификовани 1923. року зоз '' Граматику бачко – рускей бешеди ''
др Гавриїла Костельника, єдного од найобразованших и найпознатших войводянских Руснацох – священїка, доктора филозофиї, универзитетского професора и писателя, хтори живот преведол у Львове, у заходней України. Руски язик у официєлним хаснованю у АП Войводини и општини Шид.
По вири, Руснаци
греко – католїки – за свойого духовного поглавара припознаваме папу, а пестуєме восточни обряд, церковно – славянски кнїжки и обичаї. Перша парохия основана у Керестуре 1751. року, а 1777. року основана грекокатолїцка епархия зоз шедзиском у Крижевцох. Нєшка припадаме Апостолским егзархату за грекокатолїкох у Сербиї и Чарней Гори, хтори формовани 2004. року, зоз шедзиском у Руским Керестуре, а зоз административним шедзиском у Новим Саду. На чолє егзархату, владика кир Георгий Джуджар. У општини Шид перша наша парохия основана 1803. року у Шиду, а потим у Бачинцох и Беркасову. Бикич ма будинок церкви, алє нє ма парохию, понеже то филияла парохиї Беркасово. У Шиду Кирбай на Преображенє Господнє, у Беркасове на Св. Архангела Михайла, у Бикичу на Успениє Пресвятей Богородици, а у Бачинцох на Св. Луку.
Руснаци ше можу похвалїц же медзи нами нєт нєписмених, а 10 % популациї ма високе образованє. Перша школа на руским язику основана 1753. року у Руским Керестуре, а нєшка ше на руским язику отримую годзини од оводи – предшколски установи по факултети – Катедра за руски язик. У Руским Керестуре роби и єдина ґимназия на руским язику у швеце – '' Петро Кузмяк ''. У општини Шид годзини руского язика ше виучую як факултативне виучованє зоз елементами националней култури, а годзини водзи учителька Златка Сивч Здравич.
Руснаци институционално добре организовани. Од 2002. року роби и Национални совит Руснацох, хтори активно роби на запровадзованю правох нашей заєднїци, а предсидатель му Славко Орос. У шицких наших местох робя културно – уметнїцки дружтва, а окреме у обласци култури, просвити и руского язика робя Дружтво за руски язик, литературу и културу, хторе ма подружнїцу у Шиду и секциї у Бачинцох и Бикичу, а робя и Руска матка и Союз Руснацох и Українцох. Од новинох маме '' Руске слово '', а у Шиду, од децембра 2007. року, маме и перши билтен на руским язику у општини Шид - Билтен КПД '' Дюра Киш ''.
Национални символи Руснацох у Сербиї утвердзени одлуком Националного совиту Руснацох. Герб символизує Руснацох, понеже медведз стари славянски символ Карпатох, а лїва часц герба зоз белаву и златно – жовту фарбу символизує Закарпатску обласц, понеже тоти фарби символ Рюриковичох, першей рускей династиї Києву. Тот герб змесцени на сербску заставу и так символизує вязу Русанцох у Войводини зоз жему у хторей жию, и то застава Руснацох у Сербиї.
